न्यूजलाइन नेटवर्क , मुंगेली ब्यूरो
मुंगेली : छत्तीसगढ़ राजभाषा आयोग के आठवाँ प्रांतीय सम्मेलन दिनाँक 01 अउ 02 मार्च 2025 के वुड कैसल होटल रायपुर, छत्तीसगढ़ म आयोजित करे गिस। ए सम्मेलन के माई पहुना माननीय श्री विष्णुदेव साय जी मुख्यमंत्री छत्तीसगढ़ शासन रहिन। पगरइत माननीय श्री बृजमोहन अग्रवाल जी, खास पहुना श्री केदार कश्यप जी, श्रीमती लक्ष्मी रजवाड़े जी, श्री पुरंदर मिश्रा जी, श्री अनुज शर्मा जी और श्री अन्बलगन पी. जी रहिन। ए आयोग के सचिव अभिलाषा बेहार जी रहिन। ए सम्मेलन के उद्देश्य-
संविधान के आठवीं अनुसूची म छत्तीसगढ़ी ल संघारना। राजकाज म छत्तीसगढ़ी ल बऊरे के उपाय। हमर संस्कृति के रक्षा बर छत्तीसगढ़ी म पाठ्यक्रम। सम्मेलन के बिसय- छत्तीसगढ़ी पढ़बो, लिखबो, गोठियाबो अउ बगराबो रहिस। ए सम्मेलन म छत्तीसगढ़ के जम्मों जिला के कवि अउ साहित्यकार मन सम्मिलित होके छत्तीसगढ़ी म काव्य पाठ करिन। मुंगेली जिले के कवि अउ साहित्यकार डी.एल. भास्कर, राकेश गुप्त निर्मल, ज्वाला प्रसाद कश्यप, अशोक कुमार यादव, हंसदेव बांधड़े, अशोक साहू, पुन्नू गौटिया, रामभरोस साहू, रामगोपाल कश्यप अउ आकाश कश्यप सम्मिलित होके काव्य पाठ प्रस्तुत करिन। छत्तीसगढ़ राजभाषा आयोग के डहर ले सबो साहित्यकार मन ल पेन, डायरी, बैग अउ सम्मान पत्र प्रदान दे गिस।