कलेक्टर आऊ एसपी मन दीन बधई, कहिन जिला बर गरब के गोठ
न्यूजलाइन नेटवर्क, मुंगेली ब्यूरो
मुंगेली : छत्तीसगढ़ लोक सेवा आयोग हर 28 नवंबर के सीजी पीएससी 2023 के रिजल्ट जारी करिन, जेमां मुंगेली जिला के विकासखंड लोरमी के गांव नवागांव वेंकट के कुमारी किरण राजपूत हर चऊंथा रैंक लाने हें। कलेक्टर राहुल देव आऊ पुलिस अधीक्षक भोजराम पटेल मन जिला के बेटी के ए उपलब्धी के बेरा बर सराहना करत कुमारी किरण आऊ ऊंखर घरवाले मन ल बधई आऊ शुभकामना दीन। जिला कलेक्टोरेट म भेंट के बेरा म कलेक्टर मन कहिन के एक किसान के नोनी हर कतको उदीम ल तिरियावत अपन लगन आऊ जांगर भरोसा सीजीपीएससी परछो मं चऊंथा रैंक लाने हें,जऊन हर जिला भर बर गरब के गोठ हरे।
कलेक्टर हर कुमारी किरण राजपूत ल भविष मं जऊन बूता मिलही तेला सुग्घर पूरोहीं आऊ गरीब गुरबा मन ल नियाव देवाय खातिर बूता करहीं आऊ अपन सभ्यता संस्कृति ल संजोए राखत बूता करे बर रद्दा बताइन।
कलेक्टर मन जिला के आऊ प्रतियोगी परछो के तियारी करत नोनी बाबू मन ला संदेश दीन के प्रतिभा के आगू बड़े बड़े अलहन मन दण्डासरन होथें। अपन बूता ल बनाए बर बड़ मेहनत करत अपन सपना ल पूरोना हे।तभेच हमर सपना के बूता पूरा होही।
पुलिस मुखिया भोजराम पटेल मन घलो कुमारी किरण के ए बूता बनाए बर बधई आऊ शुभकामना दीन आऊ आगू घलो अपन पढ़ई बनाए राखंएं तेकर बर रद्दा देखाइन।
कुमारी किरण राजपूत मन बतईन के उन मन किसनहा परवार ले आथें। 2021-22 मं बिलसपुर में रइहके सीजीपीएससी परछो के तियारी करीन,ऊंखर पहिली शिक्षा गॉव के स्कूल आऊ कक्षा 12वीं तक के पढ़ई झाफल में होईस। बिलासा गर्ल्स कॉलेज बिलसपुर मं स्नातक के पढ़ई पूरोय पाछू निजी संस्थान ले कोचिंग करिन। पहिली घंव में सीजीपीएससी के माई परीक्षा मं पास नई होईन त ओखर मन टूट गिस फेर घरवाले मन हर मन मढ़ाईन आऊ बने रद्दा धरे रहे बर कहिन जेकर ले आज ए बेरा हर देखे बर मिलिस। दूसर परछो में चऊंथा रैंक ले परछो पास करिन। किरण के बाबू गजेन्द्र सिंह राजपूत हर अपन नोनी के सफलता म उत्छाह देखात कहिन के किरण पहिली ले पढ़ाई में हुंसियार रहिन, जेखर ले उन्हला लागते रहिसे के एक दिन उन अफसर बनके परवार,समाज आऊ जिला के नाम ल आगू लानहीं। किरण के दाई श्रीमती सरोज राजपूत मन बताइए के नोनी के ए बूता के बेरा के गोठ जम्मो परवार मन सेती होवत उछाह हरे। ए बेरा म लोरमी एसडीएम अजीत पुजारी, तहसीलदार शेखर पटेल आऊ कुमारी किरण राजपूत के परिवार के मन सकलाए रहिन।
नोट : उक्त समाचार छत्तीसगढ़ छत्तीसगढ़ी भाषा को बढ़ावा देने के उद्देश्य से प्रयोग किया गया है,व एडिटर का अपना क्षेत्रीय बोली का उपयोग किया गया है, समाचार जनसंपर्क मुंगेली के प्रेस विज्ञप्ति का क्षेत्रीय बोली में अनुवाद का प्रयास है। गलतियां व त्रुटियां मानवीय व्यवहार समझा जाए। व कमेंट कर सुधार सुझाव प्रेषित किए जाएं।